រាជធានីភ្នំពេញ៖ នៅថ្ងៃសុក្រ ទី២៩ ខែមីនានេះ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានផ្ញើសារលិខិតចំនួន ៣ ផ្សេងៗគ្នា អបអរសាទរ និងជូនពរចំពោះសម្តេចវិបុលសេនាភក្ដី សាយ ឈុំ, ឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា ដែលត្រូវបានព្រះមហាក្សត្រសព្វព្រះរាជហឬទ័យតែងតាំងជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា។

នៅក្នុងលិខិតចុះហត្ថលេខានៅថ្ងៃទី២៩ ខែមីនា ឆ្នាំ២០២៤ សម្តេចតេជោ ហ៊ុន សែន បានសម្តែងនូវការអបអរសាទរ និងការកោតសរសើរដោយសុទ្ធចិត្តជូនចំពោះឥស្សរជនទាំងបីរូបរួមមានសម្តេចវិបុលសេនាភក្ដី សាយ ឈុំ, ឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា  ដែលមានស្វាមីភក្ដិចំពោះរាជបល្ល័ង្គ ការពារ គោរពព្រះពុទ្ធសាសនា និងចូលរួមការពារនិរន្តរភាពរាជានិយមនៃព្រះរាជាណាចក្រកម្ពុជា។ 

សូមបញ្ជាក់ថា នៅថ្ងៃទី២៩ ខែមីនា ឆ្នាំ២០២៤ ម្សិលមិញនេះ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានត្រាស់បង្គាប់តែងតាំងសម្តេចវិបុលសេនាភក្ដី សាយ ឈុំ ជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា មានឋានៈស្មើនាយករដ្ឋមន្រ្តី ព្រមទាំងត្រាស់បង្គាប់តែងតាំងឯកឧត្តមកិត្តិសង្គហបណ្ឌិត ទេព ងន និងឯកឧត្តមកិត្តិនីតិកោសលបណ្ឌិត ស៊ឹម កា ជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា  មានឋានៈស្មើឧបនាយករដ្ឋមន្រ្តី៕